Čovjek koji je u Sjevernu Koreju prokrijumčario Netfliksovu seriju “Squid Game” je navodno osuđen na smrt pošto su vlasti uhvatile grupu srednjoškolaca kako gledaju snimak, prenosi Radio slobodna Azija (RFA).
U izvještaju se navodi da je serija prokrijumčarena u zemlju iz Kine na USB fleš disku. Ova serija inače nije bila dostupna gledaocima u Kini, ali je i dalje popularna zahvaljujući piratskim veb lokacijama.
Navodno, krijumčar je osuđen na smrt streljanjem, dok učenicima koji su gledali seriju prijete stroge zatvorske kazne.
Radio Slobodna Azija izvještava da će učenik koji je kupio disk dobiti kaznu doživotnog zatvora, dok je šestoro drugih učenika osuđeno na po pet godina teškog rada. Nastavnici i školska uprava su smijenjeni, isključeni iz partije i prognani na rad u udaljenim rudnicima.
Inače, u decembru 2020. godine Sjeverna Koreja je donijela zakon o „eliminaciji reakcionarne misli i kulture“, koji zabranjuje unošenje i širenje kulturnog materijala poput filmova, predstava, muzike i knjiga u zemlji.
Namjera ove odluke je prije svega da se spriječi širenje sadržaja iz Južne Koreje i Sjedinjenih Država, a oni za koje se utvrdi da su distribuirali ili konzumirali podležu kažnjavanju.
Prema brojnim izvještajima, u aprilu ove godine jedan čovjek je javno pogubljen zbog prodaje diskova sa južnokorejskim medijskim sadržajima.
